Mamalaybay

PAGTITIG SA KALANGITAN nais ko pa ring pagmasdan ang kalangitan pag gabi na'y ang mga bituin at buwan ulap sa kanyang pag-usad pag araw naman o kaya'y ang mga ibong nagliliparan ah, nais kong abutin ang mga bituin upang itirintas sa iniibig man din o sa ulap isakay siya't liliparin namin ang buong daigdig at lilibutin kadalasang inaabangan ko ang gabi nasaan kaya roon ang  Alpha Centauri ? astronomiya'y aralin, nahan ang  Milky Way o Balatas , pati ang  Tatlong Babae ? alin doon ang  Super Nova  o ang b lack hole ? mga bituin ba'y nagkakabuhol-buhol? sa teleskopyo'y magkano ang magugugol? upang sa langit ang panahon ko'y iukol nasaan ang  Pleiades  na konstelasyon? ng pitong bituin, saan nakaposisyon yaong pitong babaeng anak ni  Apolon ? sa gabi'y hanap ko rin pati ang  Orion ! - gregoriovbituinjr. 05.16.2023

KAILAN MATITIGIL ANG MGA BALITANG MURDER? ngayong araw, sa isang dyaryo pa lang, pulos murder ulat noong Mother's Day, misis, pinatay ni mister mister pa, patay sa pananaksak ng stepfather eto pa: bunso, patay sa saksak ng kanyang brother mga ulat na karumal-dumal, sa budhi'y sumbat pawang magkakadugo ang nagpapatayang sukat pulos magkakamag-anak ngunit ano bang ugat parang si Cain at Abel ang huling naiulat basahin ang mga balita't anong puno't dulo isa'y dahil sa matinding pagseselos umano mister at stepfather, sa inuman nagkagulo si kuya't bunso sa problemang pamilya'y nagtalo dinadaan ba sa init ng ulo ang usapan? magkakadugo ba silang walang kahinahunan? ayaw magpatalo sa isa't isa? walang galang? o ngayon lang bumigay sa matagal nang alitan? ganyan ang balita ngayon na pawang madudugo kailan ba pangyayaring ganyan ay maglalaho? selos ba'y damdaming di maiwasan ng kasuyo? dapat nag-usap ng mapayapa ang kuya't bunso - gregoriovbituinjr. 05.16...

ARNISADOR ngayon ko lang nabasa ang salitang  arnisador na parang estibador o sa piyer ay kargador pag embahada, embahador, pag toma, tomador subalit di magagamit ang toka sa tokador eskrimador sa eskrima, arnisador sa  arnis habang arnisadora ang babaeng nag-aarnis isa o dalawang yantok, hahawakang mabilis taal itong  Filipino martial arts  na mabangis ibinalita ni R. Cadayona ng Pang-Masa dalawang arnisador ang nakaginto talaga sa paligsahan sa  Southeast Asian Games  sa Cambodia na sina  Dexler Bolambao  at  Ella Alcoseba dalawang arnisador na nagbigay-karangalan sa isports nilang nilahukan at pinaghusayan taasnoong pagpupugay sa mga kababayan sa  Southeast Asian Games  ay ating mga kinatawan salitang arnisador ay sadyang sinaliksik ko wala pa sa  U.P. Diksiyonaryong Filipino ngunit ang paggamit na nito sa ulat sa dyaryo ay umpisa na upang gamitin na natin ito - gregoriovbituinjr. 05.16.2023 * ang ulat ay mula sa pahayagang ...

PAGPAPAK SA ULO NG ISDA binidyo ko iyon ngunit bakit nawala na baka na-delete nang di ko sinasadya pinapapak ng kuting ang ulo ng isda na pag pinagmamasdan ko'y nakatutuwa para bang sa isda siya'y gigil na gigil baka talagang gutom na di mo mapigil na pag naubos lang niya saka titigil larawang iyon sa diwa'y umuukilkil anong sarap din namang may alagang kuting basta huwag lang sa bahay patitirahin o kung sa bahay man, lagi mong lilinisin ang tirahan nila nang di mangamoy man din ibang kapatid niya'y aking napiktyuran ang mga iyon ay may ibang kwento naman ang kuting munang ito ang ating tulaan sige lang, kuting, kumain ka muna riyan - gregoriovbituinjr. 05.16.2023

SA MUTYA di man ako kasintamis ng tsokolate na paborito ng mutya kong binibini siya naman ay sadya kong pinuputakti ng tulang kaiga-igaya ang mensahe sa aking guniguni'y sadyang nag-aalab ang apoy ng pag-ibig, kapara'y dagitab nagniningas bagamat di ako pasiklab malamig man ang panahon ay nagliliyab lilipas pa rin at lilipas ang panahon ang mahalaga'y paano umibig ngayon di sapat ang rosas, dapat may bigas doon nang di naman magutom sa bawat pagbangon patuloy ang pagsasama kahit tumanda at isangdaang taon ay abuting sadya isasayaw ko ang paang pawang kaliwa nang bigyang kasiyahan ang giliw na mutya - gregoriovbituinjr. 05.16.2023

NAGSOSOLONG LANGGAM ang musika'y kaysarap pakinggan di man magkandatuto ang langgam sa paghanap ng masisilungan walang kasama, tila iniwan bihirang langgam ang nagsosolo pagkat kilos nila'y kolektibo anong nangyari sa isang ito? sa sinta ba'y nabigong totoo? "hanap ko ang sintang nawawala kaya ngayon ako'y lumuluha"; "ang hanap ko'y kapwa manggagawa upang magpatuloy sa paggawa" nagkudeta raw laban sa reyna na talagang nilabanan sila at nawalay sa mga kasama iba'y tumakas, iba'y patay na mga bagong akdang masusulat paksa'y langgam na puso'y may sugat langgam na di batid saan buhat kaya nawalay sa kanyang pangkat - gregoriovbituinjr. 05.16.2023 * kuha ang bidyo sa Daila Farm sa Tagaytay, Pebrero 12, 2023 * mapapanood ang bidyo sa:  https://fb.watch/kyIdQKIpkY/

HUWAG BASTOS SA WEYTER sinumang bastos sa weyter o weytres, layasan mo weyter man, may karapatan din, tulad mo ring tao magsilbi man sa kakain ang kanilang trabaho tratuhin mo rin sila tulad ng gusto mong trato aba'y kayganda ng kwento sa atin ni Ivana ka-deyt na nang-away ng weyter, nilayasan niya paano kung sila na, ganyan ba'y trato sa kanya buti hanggang maaga, ugali nito'y nakita kung ang tao'y magiliw kay Muhammad Ali lamang ngunit bastos sa weyter, huwag mong pagtiwalaan dahil ganyan ka rin tatratuhin ng mga iyan kung ikaw ay weyter na nasa gayong katayuan tagos talaga sa puso ang kanilang sinabi weyter ay kapwa natin, sila man ay tagasilbi mabuhay kayo, O, artistang  Ivana Alawi at dating heavyweight champion boxer  Muhammad Ali mahalaga talaga sa kanilang inilahad ay ang pagtrato mo sa kapwa, asal mo't dignidad sa anumang sitwasyon, respeto'y ating ibungad kung bastos ka sa weyter, dapat ka lang mailantad - gregoriovbituinjr. 05.15.2023

MASAHE kaysarap ni misis magmasahe ng ulo ko, tanggal pa ang kati nadama'y ginhawa ngayong gabi dahil sa mga haplos ni misis ang sakit ng ulo pa'y naalis na talagang aking tinitiis tiyak na masarap ang tulog ko na parang hinehele sa kubo nitong pangarap na paraiso - gregoriovbituinjr. 05.14.2023 * mapapanood ang 7 sec. reel sa:   https://fb.watch/kwMKBBxeEC/

BOTO higit isang taon na rin makaraang bumoto ng isang lider-manggagawa sa pagka-Pangulo bagamat anak ng diktador sa kanya'y tumalo subalit makasaysayan na ang nangyaring ito dahil pinatunayan ng ating lider-obrero kaya pala niyang makipagsabayan sa trapo at ibang kinatawan ng kapitalista rito sa entablado ng mga nais maging pangulo nakita ng masang kayang sumabay sa debate ng lider-manggagawa sa mga representante ng trapo, dinastiya, burgesya, na ang mensahe lider-manggagawa naman sa bayan magsisilbi tapos na ang panahon ng pambobola ng trapo bagamat makapangyarihan pa ang mga ito kaya pa ring gawing  B uy  O ne  T ake  O ne ang mga  BOTO ah, dapat nang wakasan ang ganyan nilang estilo - gregoriovbituinjr. 05.14.2023

NASA BOOKSALE NG SINTA pag napapadako sa  BookSale , ako'y papasok na ang kaibhan lamang ngayon, si misis na'y kasama marahil noon pa sa akin siya'y nagtataka bakit bukstor ang napili kong tambayan tuwina pagkat dito'y nakadarama ng kapayapaan na para bagang ako'y nasa sariling tahanan pag may bukstor, papasukin at papasukin iyan upang luma't bagong aklat ay makita't malaman minsan, pag usapan ng kitaan, sa  BookSale  tayo habang naghihintay, nagbabasa ng libro rito madalas aklat-literatura'y nabibili ko mura, bihira, rare book, collector's item pa ito salamat sa  BookSale  kami'y nagkasama ni misis kaya aking nadama'y kasiyahang anong tamis - gregoriovbituinjr. 05.14.2023

SA INAHING PUSA NGAYONG MOTHER'S DAY ang Mother's Day ay di lang sa tao pati sa inahing pusang ito dati'y anim yaong anak nito ngayon, lima na lang ang narito isa'y kinuha ng kapitbahay lima'y inaalagaang tunay ina siyang laging mapagbantay sa limang kuting nakasubaybay naghahagilap lagi ng isda para sa kanyang limang anak nga wala pang sambuwan ang alaga talagang mga sanggol pa't bata alagaan mo silang mabuti na sambuwan na sa Disi-Syete pakakainin ko rin parati ang limang alagang kuting dine - gregoriovbituinjr. 05.14.2023 * may bidyo nito na mapapanood sa:  https://fb.watch/kv_XKZYKWO/

HAPPY MOTHER'S DAY SA LAHAT NG NANAY Happy Mother's Day  sa lahat ng nanay sa inyo'y taospusong pagpupugay kayong sa amin nagpalaking tunay kami'y binigyan ng mabuting gabay dinala kami sa sinapupunan sa loob ng singkad siyam na buwan hanggang sa kami'y inyong isinilang liwanag ng araw na'y nasilayan binihisan n'yo kami't pinag-aral at pinagluluto pa ng almusal pinababaunan pa ng minindal tiniyak lumaki kaming may dangal pasalamat namin ay labis-labis nariyan kayong di kami tiniis hanggang mag-asawa kami't umalis ay tiniyak kami'y di malilihis gayunman, kung may nagawa mang sala sa anumang parusa'y nakahanda kapatawaran po'y hangad na sadya huwag po lamang kaming isusumpa silangan, kanluran, ilaya't hulo kami'y pinatnubayan n'yong totoo nawa'y manatiling malusog kayo Happy Mother's Day  pong muli sa inyo - gregoriovbituinjr. 05.14.2023

  HAPPY MOTHER'S DAY PO, INAY! Happy Mother's Day po, aking Inay ikaw na sa akin ay gumabay sa magkakapatid pumatnubay O, Inay, mabuhay ka! MABUHAY! maraming salamat po sa inyo at napalaki akong totoo sana'y magaling nang inhinyero lalo't kinahiliga'y numero subalit di naman nakatapos dahil nagpasya akong kumilos sa uri't bayan magsilbing lubos tulad ng pagmamahal mong taos wala akong materyal na handog kundi pasalamat sa paghubog upang maging matatag, di hambog nawa, Inay, lagi kang malusog iba man ang landas kong pinili kumilos upang kamtin ang mithi ang pagsinta mo'y nananatili O, Inay, Happy Mother's Day muli - gregoriovbituinjr. 05.14.2023

TUGON KO SA TANONG NI DOC BEN "Anong karapatan mong magretiro't magpahinga sa bawat laban para sa kagalingan ng masa na para kumain, nangangalakal ng basura pang-almusal, tanghalian, hapunan ng pamilya?" napaisip agad ako sa kanyang simpleng tanong at nais kong magbigay ng napag-isipang tugon magretiro sa laban ay wala sa isip ngayon pagkat retiro ko'y pag sa lupa na nakabaon dahil ang paglilingkod sa masa'y hindi karera na pagdating ng edad sisenta'y retirado na baka magretiro lang pag nabago ang sistema at nakuha ang kapangyarihang pampulitika hangga't may mga uri at pribadong pag-aari na sa laksang kahirapan sa mundo'y siyang sanhi asahan mong sa pakikibaka'y mananatili aktibistang Spartan tulad ko'y nais magwagi ipanalo ang asam na lipunang makatao lipunang patas, bawat isa'y nagpapakatao kung ang rebolusyon natin ay di pa nananalo asahang retiro ay wala sa bokabularyo - gregoriovbituinjr. 05.13.2023

DAPAT WALANG HARI SA ATING ALAMAT kayrami nang hari / sa mga alamat gayong walang haring / sa bansa'y nagbuhat hari'y pawiin na / sa maraming aklat merong datu't rahang / dapat maisulat tayo'y lumaki na / sa ganyang imbento na unang panahon / ay mayroon nito baka nahalina / sa kwento ng dayo sadyang mentalidad / kolonyal pa ito wala namang hari / sa bayan kong gipit sa mga alamat / ay inulit-ulit para bang banyaga / sa kwento'y umukit gayong walang hari / kahit pa mabait kamakailan lang, / hari'y pinutungan na sa Inglatera'y / may hari na naman subalit sa ating / bansa'y walang ganyan wala tayong hari / sa sariling bayan kaya ang isulat / sa kwento't pabula ay datu at raha / na meron sa bansa o kulturang lumad / sa kwentong pambata kasaysayan nati'y / balikan ding sadya - gregoriovbituinjr. 05.13.2023

TAHONG kaysarap naman ng kanyang tahong na niluto, napakalinamnam tagos sa puso, wala nang tanong kung paano nilutong kay-inam tiyak ako'y mabubusog muli sa nilatag sa hapag-kainan masarap na naman ang tanghali at kami rito'y magkakainan wala akong masabi sa luto na tanging makakapagsalita ay gutom na tiyang nasiphayo at itong lalamunan at dila salamat talaga sa tahong mo sadyang malasa nang kinain ko - gregoriovbituinjr. 05.13.2023

MICROPLASTICS SA METRO MANILA meron na raw microplastics sa hangin sa Metro Manila, anong gagawin batay iyan sa ginawang aralin na di natin dapat balewalain ang ganyang balita'y kahindik-hindik ang buhay na natin ay patiwarik napalibutan na ng microplastic baka sa ating mata'y magpatirik may dapat gawin, di lang ang gobyerno dapat may partisipasyon ang tao upang malutas ang problemang ito di madamay ang anak mo't apo ko ang dulot nito'y panganib talaga lalo na sa mga nasa kalsada nagwawalis, ang vendor, motorista pasahero, nagtatrapik, ang masa sinong problema kung tanunging bakit suliranin muna'y lutasing pilit isa ang facemask sa dapat magamit nang di na lumala pa't magkasakit - gregoriovbituinjr. 05.13.2023

ANG MGA KUTING kaysarap masdan ng mga kuting balahibo pa'y haplus-haplusin hayaan muna silang maglaro subukan kaya nilang maligo subalit baka naman sipunin at sila'y magalit lang sa akin ah, hayaan na silang maglaro at matutulog din pag nahapo - gregoriovbituinjr. 05.13.2023

KASUMARAN PALA'Y ANIBERSARYO may katutubong salita pala tayo sa wikang Espanyol na anibersaryo ito ang  KASUMARAN  mula Sebwano salitang taal na wikang Filipino tara, gamitin natin ang  KASUMARAN sa mga petsang ating ipagdiriwang sa Hulyo'y Kasumaran ng Katipunan di ba, ayos, di naman pangit pakinggan itaguyod ang katutubong salita ipalaganap upang gamiting sadya ang di raw magmahal sa sariling wika ay higit sa hayop at malansang isda ang mahalaga sa bawat nahagilap na salita'y unawa't ipalaganap gawin ito nang may buong pagsisikap nang sa kalaunan ay gamiting ganap - gregoriovbituinjr. 05.12.2023 * mula sa U.P. Diksiyonaryong Filipino, p.591

BUHAY PAG-IBIG tila ba Florante at Laura ang aming pag-ibig? o Romeo at Julieta ba pag kami'y nagniig? wala riyan, nagkaunawaan lang at nakinig ang aming puso habang kumakain ng pinipig simpleng pamumuhay at makuntento na sa buhay bagamat may pangarap kaya kami nagsisikhay nangangarap akong magawa ang nobelang tunay asam naming magkalimang anak ay hinihintay sa bawat ginagawa'y nagpapatuloy pa kami ako sa baya't uri'y patuloy na nagsisilbi siya'y tangi kong diwata't sa puso'y celebrity na patuloy ang komunikasyon araw at gabi akala'y magsyota kami ngunit di naman pala subalit lagi kaming magkasamang mag-asawa naniniwalang habang may buhay ay may pag-asa na walang iwanan sa kabila ng saya't dusa - gregoriovbituinjr. 05.12.2023